Irailaren 8an hasiko dituzte eskolak, haur hezkuntzako, lehen hezkuntzako, DBHko eta Batxilergoko ikasleek EAEn, eta ordurako segurtasun-protokoloa zehazteko dago gau-gaurkoz. Autonomia erkidegoetako ordezkariak eta Espainiako Gobernuko Hezkuntza Ministerioa gaur goizean bildu dira Madrilen, protokoloa zehaztu eta neurriak finkatzeko asmotan.
Egoera hobea, baina txertatu gabe
Bingen Zupiria Jaurlaritzako bozeramaileak aurreko ikasturtean ikastetxeetan hartu zituen neurri berak mantentzea babestu du, tartean burbuila taldeak eta maskararen erabilera. Egoera iazko irailean baino "hobea" dela azaldu du Zupiriak, baina txertoa ez dela oraindik iritsi haurrengana: "Orokorrean, egoera duela urtebete baino hobea da, baina 12 urte baino gutxiago dituztenak ez daude txertatuta, ez dagoelako adin horietarako txertorik". Une honetan, 12 eta 19 urte bitarteko pertsonen erdiek – % 55,4 –COVID-19aren aurkako txertoaren dosi bat jaso dute gutxienez, eta –% 13k– pauta osoa.