"Herriz-herri eta eskualdez eskualde batu garen herritar bakoitza bide honen bultzada izaten ari gara. Eta emandako urrats bakoitzari esker iritsi gara egungo egoerara", diote Sare Herritarratik. Izan ere, uste dute azken ikasturte honetan urrats garrantzitsuak eman direla urruntze politikarekin amaitzen hasi eta euskal presoen gradu progresioari dagokionean: "Salbuespen politikak indarrean jarraitzen duen bitartean ordea, euskal presoen egoera ez da normalizatuko".
Hori dela eta, mobilizatzen jarraitzeko deia luzatu diete herritarrei: "Euskal preso, deportatu eta iheslarien etxeratze prozesua ahalbidetzeko ezinbestekoa baita gutako bakoitzaren parte hartzea".
Debagoienean ere bai
"Maiatzean hasi eta abuztuaren 21a bitarte, ez da aste bat bera ere igaro mobilizaziorik gabe", ekarri dute gogora.
Debaldeatik Buruntzaldeara, Goierrira, Tolosaldeara, Urola-kostara eta azkenik Oarso Bidasoara egin du dinamikak. Eta Debagoienean ere egin zuen geldialdia ekaina inguruan. Ekintza ugari egin zituzten: besteak beste, Arrasaten bertso-saioa egin zuten, Oñatin bizikleta martxa eta Aretxabaletan mosaiko erraldoia.
Hala, denbora guzti horretan manifestazioak, mosaiko erraldoiak, bertso-saioak, bizikleta martxak, kale zinema, pala txapelketak, mendi irteerak, musika eta kultur emanaldiak, futbito txapelketak... antolatu dituzte "salbuespen legediarekin amaitu" eta etxerako bidea "egi bihurtzeko".
