Bolivian bizi diren 37 komunitate linguistikok "lanean dihardu" beraien oraina eta etorkizuna ziurtatzeko, eta ildo horretatik, guarani eta ketxua komunitateekin hartu-emana izan du Garabide elkarteak azken hamar urteetan; batez ere, formakuntza kontuetan. Eta ahalegin horretatik sortu da "ekimen esanguratsu" hau. Euskal Herriko esperientzia aztertuko dute eta boliviar hizkuntza komunitateen jarduna "norabide egokian" jartzea da asmoa.
Hiru egunetan egingo dituzte lan saioak, uztailaren 6tik 8ra, 10:00etatik 12:00etara. Eta hamalau hizlarik hartuko dute parte: bederatzi boliviarrak dira –tartean gobernuko bi kide–, lau euskal herritarrak eta bat kolonbiarra (nasa). Euskal Herriko esperientziaren berri emango dutenak honako hauek izango dira: Jon Sarasua (MU eta Garabide); Josune Zabala (Eusko Jaurlaritzaren HPS); Sagrario Aleman (Euskaltzaindia); eta Iñaki Martinez de Luna (Garabide).
Zoom eta Facebook Live bidez jarraitu ahal izango dira topaketak. Izena aurretik eman daiteke, hemen, baina izena eman gabe ere jarraitu ahal izango da Garabideren webgunetik.
