2017an hasi zen Mondragon Unibertsitatea Zibersegurtasuneko Masterra eskaintzen. Orain, baina, ZIURekin sinatutako hitzarmenari esker, eskaintza hori indartuko dela azaldu du Carlos Garcia Goi Eskola Politeknikoko zuzendariak: "Eskaintzen dugun Unibertsitate Master berrian zibersegurtasuna lantzen dugu (Datuen Analisia, Zibersegurtasuna eta Hodei-Konputazioa izeneko masterra, zehazki), eta profesionalei zuzendutako ikastaroetan ere gora egin dute gai honi lotutako ikastaroek. Hala, talentu gaztea zein profesionalak espezializatzea enpresen eta gizartearen erronkei aurre egitea izango dira orain helburuak".
Hitzarmenak jasotzen duenez, bi eragileek hainbat ekintza egingo dituzte elkarlanean: unibertsitatearen eta enpresaren arteko Formakuntza Duala bultzatzea; topaketak, konferentziak, master eta formakuntzak antolatzea; ordezkaritza eta lan foroetan, kongresuetan edo ferietan parte hartzea; edota bi aldeek bultzatu ditzaketen intereseko proiektuak identifikatzea.
