Berdinsarea osatzen duten Eudelek eta Emakundek "beharrezkoa" ikusi dute, jairik ez dagoen honetan, orain arteko jai-eredua "egungo gizartera egokitzea". Horretarako, Margaret Bullen antropologo feministak tailer bat gidatu du gaur Bilbon.
Azken urteetan egindako urratsak nabarmendu ditu Bullenek (berdintasunerako toki-planak, udal-akordioak...) eta adibide zehatzagoak ere aurkeztu ditu; hala nola, Gasteizko, Gernikako edota Tolosako jai-ereduetan egindako eraldaketak.
Bestetik, Emakundek gai honen inguruan egindako azterlana ere aurkeztu da gaur: Emakumeek Euskal Autonomia Erkidegoko tokiko jaietan parte hartzeko estrategiak. Emakumen parte-hartzea sustatzeko, hainbat herritan garatu diren ideiak bildu dituzte bertan: erritu eta ekitaldi nagusietan rolak banatzeko gakoak, emakumeak sozializazio-espazioetara sartzeko tresnak edota jaietako erabaki- edo ardura-postuetan egoteko giltzak...
