Txapelketa gutxiago izan ditu aurtengo denboraldiak eta hitzordu horietako bat izan da asteburuan jokatu den Euskadiko Amateur txapelketa. Zapatuko saioan, June Legorburuk lehen postua eskuratu zuen pilotarekin egindako ariketari esker, eta hirugarren sailkatu zen xingolarekin. Hala, sailkapen orokorrean bigarren postua eskuratu zuen antzuolarrak.
Taldekako ariketan, laugarren postuan sailkatu zen Jubenil B mailako taldea, Miren Legorburu eta Naia Aranguren antzuolarrek, eta Lierni Azkarate eta Itziar Alberdi bergararrek osatzen duten taldea.
Denboraldi ezohikoan, lan txukuna
Bakarkako saioan aritu da domeka goizean ere Itziar Alberdi, kadete B mailan; bigarren postua eskuratu du uztailarekin, laugarrena mazoekin. Sailkapen orokorrean, hala, bigarren postua eskuratu du Alberdik. Era berean, lehenengoz lehiatu den Ainhoa Mediavillak ere 19. postuan bukatu du txapelketa, uztailarekin.
Izan duten "denboraldi arraroa" kontuan izanda, lehiatzeko aukera izan dutela behintzat azpimarratu du Ainize Lizarralde entrenatzaileak: "Helburu batzuk finkatu eta horiek lortzeko lan egiteko aukera izan dugu behintzat".