UDAk iaz lortutako bosgarren postuan nahi du aurtengoa ere amaitu. "Helburu polita da; ikusita ze urte zaila izan dugun, iazkoa errepikatzea uste dut denboraldia amaitzeko modu txukuna dela", adierazi dio GOIENAri UDAko aulkian azken partidua egingo duen Mikel Larburuk. Izan ere, joan den astean Bergararen kontrako kanporaketa gainditu izanak (2-3) ematen die aretxabaletarrei horretarako aukera. Hala, UDAk Zarautzen kontra jokatuko du bihar (12:15) play-off-eko azken norgehiagoka.
Bergarak, berriz, zazpigarren sailkatzeko helburuarekin hartuko du Elgoibar Agorrosinen (16:00). "Iaz atzealdean larri ibili ginen eta aurten pausoa eman dugu aurrera, play-off-erako sailkatuta. UDAren kontra galdu izana pena da, baina hobe halakoak ezer jokoan ez dagoenean bizi izatea. Ikasgai ona izan da", adierazi du Barkerok.