Bobina metalikotik abiatuta, txapa mozteko sistema berria diseinatu eta fabrikatu dute Danobatgroup eta Fagor Arrasatek. Azaldu dutenez, ekonomiarako estrategikoak diren sektoreetan erabiltzeko da, hala nola, automobilgintzan.
Bi taldeetako ordezkariek azaldu dutenez, lankidetza "ezinbestekoa" izan da sistema diseinatzerako orduan. Adierazi dutenez, Danobatgroupek laser-ebaketako soluzioen eta simulazio-softwareen garapenean egin du lan, eta Fagor Arrasatek, berriz, materialen prozesaketan eta automobilaren sektorean duen ezagutza baliatu ditu.
Hainbat onura dituen asmakuntza
Orain arte erabili diren sistemekin alderatuta, blanking-ak trokela erabiltzea ekiditen duenez, denbora aurrezten dela azaldu du Mikel Lopez, Fagor Arrasateko Siderurgiako Negozio Unitateko zuzendari komertzialak: "Produktibitate handiagoa eta ebaketa-kalitate hobea eskaintzen ditu".
Bestetik, hainbat materialekin lan egiteko gaitasuna duela esan dute: altzairu arruntarekin, herdoilgaitzarekin, HSS erresistentzia handiko altzairuekin edota aluminioarekin, –zabalera, lodiera eta kalitatea edozein dela ere–. "Lerro malgua denez, neurketa-zabalera desberdinetara egokitu daiteke, eta xaflaren gainazal osoan banatu fabrikatzen diren piezen marrazkia, materiala askoz hobeto aprobetxatuz", gehitu du Lopezek.