Gipuzkoako egoitzen sareko erabiltzaileek, senideek eta langileek zaintza politiketan parte hartzea sustatu nahi du Foru Aldundiak. Hala, aste honetan galdetegi bat bidaliko zaie erabiltzaile guztiei, erreferentziazko senideei eta egoitzetan lan egiten duten langileei; guztira, 10.030 inkesta. Familia eta langileak "zainketen diseinatzaile" bihurtu nahi ditu Aldundiak, eta Maite Peña Gizarte Politikako foru diputatuak azaldu duenez, inkestak baliagarriak izango dira horretarako: "Lehen urratsa da parte hartzeko eta ebaluatzeko sare bat aktibatzeko. Oso baliagarria izango da etorkizuneko gizarte politikak diseinatzen jarraitzeko; batez ere iraupen luzeko zaintzetara bideratutakoak".
Galderak COVID-19aren aurreko kontingentzia-neurriei buruzkoak, zerbitzuen, espazioen, zainketen eta arretaren kalitateari buruzkoak edota gizarte-berrikuntzarekin lotutakoak izango dira. Peñak aurreratu duenez, behin emaitzak jasota, hainbat kontraste-talde sortuko dira "eztabaidatzeko eta ekarpenak jasotzeko", eta, horrela, "ekintza-plan zehatz bat" sortzeko.
