Bergarak eta Aretxabaletak play-off-etako itzuliko norgehiagoka jokatuko dute zapatu arratsaldean. Mahoneroek 16:30ean hartuko dute Añorga, eta donostiarren etxean izandako porrotari (3-2) buelta eman beharko diote. Barkeroren mutilek galdu egin zuten joanekoa Rezolan, baina galduta ere bi gol egiteko gauza izan ziren, eta ez da horren emaitza txarra. Horrek esan gura du Agorrosinen partidua derrigor irabazi behar dutela, baina, behin hori eginda, euren atea ondo defendatzen badute kanporaketa ondo gaindi dezaketela.
UDAk, emaitzari dagokionez, errazago du kanporaketa gainditzea, Ibarran 2-0 irabazi zuen eta. Garaipenarekin batera atea hutsean mantentzea oso garrantzitsua izan zen, baina egia da, baita ere, Lesakan sufritzea egokituko zaiela.
Mondrak, Kopako partidua
Euskaldunari irabazi eta gero, Touringen zelaian, Fanderian, jokatuko du Mondrak Kopako kanporaketa (bihar, 16:30).