Avanza Movilidad Gipuzkoako Enpresa Batzordeak azaldu duenez, zapatuan, 17:45ean, Debagoiena zeharkatzen duen Eibar-Gasteiz lineako autobusean erabiltzaile bat sartu zen "haserre", autobusaren zain "denbora asko" zeramala esanez. Soraluzeko geraleku nagusian izan zen, eta gidariak azaldu duenez, erabiltzaileak bertan zeudenak iraintzeari eta gidaria mehatxatzeari ekin zion. Gidariak Ertzaintzara deitu zuen ondoren, eta adierazi du momentu horretan erabiltzaileak labanarekin mehatxu egin ziola.
Ertzaintzak bere aldetik, jakinarazi du 48 urteko gizonezkoak "aurrekari ugari" dituela, eta mehatxu delitua egotzi diola diligentziak. Eibarko Epaitegiaren esku geratuko da.
ELAko ordezkaria den Eugenia Pablosek adierazi du "geroz eta ohikoagoak" direla gidarienganako erasoak eta erabiltzaileak "suminkorrago" daudela sumatzen duela. "Oinarrizko langileak bagara, babes gaitzatela erakundeek", gehitu du.
Elkarretaratzea, egubakoitzean
Enpresa Batzordeak elkarretaratzea egingo du etzi, gertatutakoa salatzeko. Donostiako Gipuzkoa plazan izango da 11: 00etan. "Aldundiaren eta enpresaren aurrean bizi dugun egoera salatu nahi dugu, eta langileei beren lanpostuan segurtasun handiagoa emateko eta gertatutakoa bezalako gertaerak saihesteko dagozkien neurriak har ditzatela eskatu".
Bestetik Pablosek aurreratu duenez, ELAren asmoa zerbitzuetan etenak egitea da, eta gainerako sindikatuen erantzunaren zain daudela gehitu du.