Lurralde orekari laguntzen dioten "proiektu kolektiboak" lagundu asmoz, 950.000 euroko partida aurkeztu du Gipuzkoako Foru Aldundiak: "Helburua da Gipuzkoako landa eremuetako ekonomiaren garapen integrala eta sustapena bultzatzea, garatzen ari diren edo garatu nahi diren jardueren ekonomia eta ingurumen arloko errendimendua hobetuz, batez ere nekazaritza ustiategietan".
Gipuzkoako udalek eta toki erakunde txikiek, landa garapeneko elkarteek, eta nekazaritza elkarte eta kooperatibek eskatu ahalko dituzte laguntzak, baina betiere lehen sektoreari eta bertako landa biztanleei zerbitzuak ematea bada proeiktuaren helburua eta Gipuzkoan abiatzen badira. Baldintzak, Gipuzkoako Aldizkari Ofizialean daude.
Horri lotuta, Aldundiak jakinarazi duenez, landa garapeneko elkarteek, nekazaritza elkarteek eta kooperatibek % 65eko dirulaguntza jaso ahal izango dute. Eta Udalen kasuan, txikienei emango zaie lehentasuna; 1.000 biztanletik beherakoek % 65ekoa jasoko dute, eta 1.000 eta 2.500 biztanle bitartekoek % 60koa.
Komunitateek eskatutako zerbitzuak emateko makinak eta ibilgailuak erostea, landa eremuaren eta hiri eremuaren arteko arrakala digitala murrizteko nekazaritza zerbitzuak modernizatzea eta digitalizatzea edota nekazaritza produktu berriak eraldatzeko, merkaturatzeko edo garatzeko inbertsio proiektu berritzaileak egitea dira dirulaguntzak jaso ditzaketen asmoetako batzuk.