1.841.000 euroko zuzkidura izango duen programa aurkeztu du Foru Aldundiak Gipuzkoako "jarduera ekonomikoa eta berrikuntza" sustatzeko helburuarekin. 195.000 euro bideratuko dira enpresa bat sortzeko proiektuei laguntzeko, 245.000 euro emakumeek sustatutako enpresa-proiektuei laguntzeko eta 1.401.000 euro oinarri teknologikoko enpresak eta enpresa berritzaileak sortzen laguntzeko.
Gipuzkoako Aldizkari Ofizialean argitaratuko dituzte oinarriak eta baldintzak, eta eskaerak aurkezteko epea zabalik egongo da urriaren 18ra arte. Halere, maiatzaren 31ko 12:00ak arte egongo da aukera, emakumeen enpresei bideratutako laguntzak eskatzeko.
Jabier Larrañaga Ekonomia Sustapeneko, Turismoko eta Landa Inguruneko diputatuak azaldu duenez, enpresen "lehiakortasuna indartzea" nahi da, eta baita ekintzailetza aurreraturako "baliabide gehiago bideratzea" ere; batez ere RIS-3 espezializazio adimenduneko estrategiarekin lerrokatutako eremuetara: "Proiektu horiek gure sare ekonomikoa dibertsifikatzeko eta eraldatzeko gaitasuna dute eta balio erantsi handiko sektoreetan kokatzen dira; hala nola, mugikortasun berrian, fabrikazio aurreratuan edo biozientzietan".
Iaz, 435 proiektu
Aldundiak emandako datuen arabera, programak 435 enpresa-proiektu sortzen lagundu zuen iaz; 223 emakumeek sustatutakoak izan ziren eta 37 start up edo oinarri teknologikokoak izan ziren.