Sailkapeneko bigarren postua eskuratuta zuen dagoeneko Bergarak, eta jokoan ezer ez izan arren, Mutrikun 3-4 gainditu ostean, UDAk hurrengo faserako txartela eskuratu du mahoneroen garaipenari esker.
Ohorezko Mailako lehen faseko sailkapenean 9 punturekin berdinduta gelditu dira Mutriku eta UDA, baina aretxabaletarrek average hobea dutenez, laugarren postua lortu dute. UDAko entrenatzaile Mikel Larburuk dio ilusioz ekingo diotela Hirugarren Mailara igotzeko faseari: "Bergaran berdindu ostean uste genuen gure aukerak agortu zirela baina azkenean lortu dugu igoera fasean sartzea. Ez dugu ezer galtzeko". Beti Gazteren aurka jokatuko dute lehen kanporaketa, hurrengo jardunaldian, Ibarran. Beti Gazte bere multzoko lehena denez itzulerako partidua jokatuko dute euren etxean. "Eurak dira faborito, multzoko lehenak sailkatu direlako eta talde oso ona dutelako. 180 minutu iraungo duen partidua izango da eta gure helburua izango da etxean golik jaso ez eta itzulerako partidura bizirik heltzea".