EH Bilduren zuzendaritza politikorako hautagaitzak aurkezteko epea amaitu da dagoeneko. EH Bilduren Mahai Politikoak iragarri zuen zuzendaritza politikorako bere proposamena aurkeztuko zuela eta ez da beste hautagaitzarik aurkeztu eta, horrenbestez, bilkideek maiatzaren 6tik 8ra bitartean bozkatu ahal izango dute Arnaldo Otegi buru duen zerrenda. Otegi koordinatzaile nagusi izateko hautagai izango da, eta harekin batera jardungo lukete hainbatek; tartean, Larraitz Ugartek, komunikazio zuzendari moduan.
EH Bilduren zuzendaritza politiko nazionalerako hautagaitzaz gain, bilkideek herrialdeko arduradun politikoetarako euren hautagaitzak aurkeztu ahal izan dituzte. Herrialde bakoitzeko hautagaitza bat aurkeztu da.
Azkenik, EH Bilduko militantziak maiatzaren 6tik 8ra bitartean bozkatuko ditu Berme Batzordea eta Kontuen Batzordea osatuko dituzten kideak. Berme Batzorderako zerrendako kide da Ino Galparsoro, eta, aldiz, Kontuen Batzorderako hautagai da Maider Otamendi.