Lau jardunaldi geratzen zaizkie biei ala biei, eta joan den astean, esaterako, Eskoriatzakoak liderraren kontra berdintzeko gauza izan ziren (2-2), eta duela bi aste hartutako kolpetik errekuperatzeko. Eskoriatzak ez du erraz gora begiratzea, Labastidak 8 puntuko aldea dauka eta; gainera, tartean beste talde batzuk ere badaude. Esaterako, bihar kontrario izango den Afantxok (17:00) Eskoriatzak baino bi puntu ditu; kontrario zuzena da, horrenbestez.
Mondratek, lau final
Euskal Ligako aurrealdeko postuak ere asko estutu dira, oilar asko daude mailaz igotzeko lehian, eta Mondrate da horietako bat. Domekan, Otxartaberen bisita izango dute arrasatearrek Musakolan (17:30). Orain momentuan, arrasatearrak bigarren daude sailkapenean eta lider dagoen Jarrilleros hiru puntura dago; hain zuzen, talde horren kontra jokatuko dute atzealdeko postuetan dauden aretxabaletarrek domekan, Ibarran (11:30).