"Hiru Haundiak antolakuntza taldetik, jakinarazpen honi hasiera eman nahi diogu epe luze honetan zehar izan duzuen pazientzia eta ulermena eskertuz. Guretzat hilabete luzeak izan dira, zuhurtasunez lan egin eta erakundeekin etengabe harremanetan egon beharreko garaiak, aurtengo edizioari buruz ahalik eta lasterren erantzun bat emateko helburuarekin".
2020ko urriaren 17an egitekoa zen edizioa bertan behera geratu zen pandemiaren ondorioz, baina dagoeneko ofizialki adierazi dute 2021eko urriaren 9an itzuliko dela Hiru Haundiak proba. Gorbeia, Anboto eta Aizkorri mendietako tontorrak zeharkatzen dituen mendi lasterketa gauzatzeko itxaronaldia luzea izan bada ere, neurri guztiak hartuko dituztela adierazi dute antolatzaileek.
Neurri guztiak hartuta
"Gogo handiz baieztatzen dizuegu Hiru Haundiak ekitaldiaren XXII. edizioa 2021eko urriaren 9an izango dela. Hau gertaratzeko aire zabalean den ekitaldi baterako neurri guztiak kontuan hartuko ditugu: distantzia soziala, musukoaren erabilera pertsona-kontzentrazio handiko guneetan, irteera mailakatua, hornidura puntuak…hilabete hauetan zehar pixkanaka jakinaraziko dizkizuegunak".
Maiatzaren 10ean informazio gehiago
Maiatzaren 10ean izena emateko prozeduraren inguruko informazioa plazaratuko dute antolatzaileek. Eta gaineratu dute, 2020ko zerrendak mantenduko dira, baina bajak egonez gero, itxaron-zerrendetako jende gehiagok eman ahalko du izena.
