Bidexka gorabeheratsuz jositako lasterketetan ondo baino hobeto moldatzen dela erakutsi du berriz ere Oihana Kortazarrek. Espainiako Mendi eta Eskaladako Kirol Federazioak –FEDME– aurten antolatutako bost karreretako lehena jokatu dute asteburuan Sevillako probintzian, Algamitaseko haitzaren inguruan, eta emakumezkoetan nagusitasun handiz gailendu da elgetarra, 2 ordu, 58 minutu eta 57 segundo behar izan baititu ibilbidea amaitzeko. Bigarren Maite Maiora mendaroarra helmugaratu da, 3 ordu, 2 minutu eta 48 segundoko denborarekin.
Xabi Lete eta Iñigo Alzola, txukun
Euskal Mendizale Federazioko bost gizonezko ordezkarien artean bi debagoiendar lehiatu dira Sevillan: Xabi Lete oñatiarra eta Iñigo Alzola arrasatearra. Bata 13. postuan helmugaratu da, eta bestea, 28.ean.
