Lan egiteko eta lankidetzan aritzeko moduak aldatu egin direla azpimarratu du Garaia Parke Teknologikoak prentsa ohar baten bitartez: "Gaur egungo ingurune ziurgabe eta aldakorra geratzeko etorri da, eta horrek erronka garrantzitsuak dakarzkie erakundeei eta, batez ere, pertsonei. Ezin dugu ahaztu garai hauetan hainbat erakundetan garatzen ari diren irtenbide zientifiko eta teknologiko guztien atzean pertsona batzuk daudela beren talentua aplikatzen, soluzioak aurkitzeko, eta erabiltzaileak edo onuradunak daudela".
Pertsonen kudeaketaren profesionalek eskaini dezaketenari arreta jartzea ezinbestekoa iruditzen zaienez, maiatzeko asteartero, pertsonen eta erakundeen talentuaren kudeaketari, adimen emozionalari eta eraldaketa kulturalari lotutako jardunaldiak eta tailerrak egingo dituzte. Jardunaldi hauetan parte hartzeko izena online eman beharko da, eta horretarako, beharrezkoa den informazio guztia Garaiaren webgunean egongo da.
Egitaraua honakoa da:
- Maiatzak 4, 09:00-11:00: Amaia Munuera (WeBring): "Nola erakarri talentua eta ez hil saiakeran. Deskubritu nola bultzatu zure employer brandinga".
- Maiatzak 11, 09:00-11:00: Judith Castillo (Equilia): "Nola gidatu balio partekatuek bultzatutako erakundeak?".
- Maiatzak 18, 09:00-11:00: Alaitz Osa eta Romu Arteche (Kruce): "Lidergo transformazionalaren 5 ardatzak".
- Maiatzak 25, 09:00-11:00: Zuriñe Altube: "Adimen emozionala, talentua garatzeko giltzarria".
Eskaintza, oro har, gizarte osoari zuzenduta dago, eta, bereziki, taldean lan egiten duten pertsonei: hainbat posizio eta eginkizunetatik Giza Baliabideetako profesionalei, erantzukizuneko karguak dituztenei eta jendaurrean edo hezkuntza sektorean lan egiten dutenei.