Diputatuak azaldu duenez, pasa den urteko kanpainan 65.000 herritarrek aurkeztu zuten Errenta aitorpena euskaraz eta, gaur gaurkoz, 80.000 herritarrek dute eskatuta Ogasunarekin harremana euskaraz egitea. “Gure helburua, ordea, da 2023rako 100.000 herritar izatea Ogasunarekin euskaraz egiten dutenak. Eta, horretarako, Errenta kanpaina baliatu nahi dugu, aukera ona da euskararen aldeko hautua egiteko; bulegoetan, internet bidez edota proposamena onartzerako orduan”, esan du diputatuak.
Peronak azaldu duenez, gaurko egunean 875 gipuzkoarrek aurkeztuko dute Errenta aitorpena modalitate honen bitartez, Ogasunaren bulegoetan. Gainera, pasa den ostirala izan zen mekanizaturako hitzordua hartzeko lehenengo eguna, eta egun hartan 12.710 txanda hartu zituzten herritarrek. Errenta kanpainari orokorrean begiratuta, diputatuak esan du “indartsu” hasi dela modalitate guztietan, eta “erritmo oso onean” doala.
Apirilaren 12an hasi zen Errenta kanpaina Gipuzkoan, orduan hasi baitzen proposamenak onartzeko epea, eta ekainaren 30era arte luzatuko da. Ogasunaren aurreikuspenen arabera, 382.000 aitorpen aurkeztu dira kanpainan, eta foru erakundeak 292 milioi euro itzuliko dizkie gipuzkoarrei, eta beste 273 milioi euro jaso.
