Debagoieneko ESIk egungo egoeraren gaineko datu gordinak azaleratu ditu. Laugarren olatu honetan Debagoienean intzidentzia metatuaren batazbestekoa 753ekoa da. Nabarmentzekoak dira Oñatikoa (1.357), Aretxabaletakoa (1.144), Eskoriatzakoa (901) eta Arrasatekoa (715). Pazienteen intzidentzia gorakada hau osasun zentro guztietan igartzen dabiltza, eta guztietan du eragina. Hala, urgentzietara doazenen %40a COVID-19agatik da, eta ospitalaratzeen %42a patologia horrexegatik da.
Datu horien aurrean, Debagoieneko ESItik deialdia egin dute arduraz jokatzeko, oraingoz neurri eraginkor bakarra dela prebentzio neurriak errespetatzen jarraitzea, eta Zaintza Sareko taldearekin erabateko kolaborazioa egon dadila herritarren partetik, hau da, aztarnarien lana errespeta dezatela: "Euren esanak bete eta bakartutako kasuetan euren gomendioak jarraitzea ezinbestekoa da".