Bi jardunaldi geratzen dira Ohorezko Erregional Mailako lehenengo fasea amaitzeko, eta playoff-etarako sailkatzeko lehian Mondra dagoeneko jokoz kanpo geratu da. Hala, Bergara da, 10 punturekin, bailarako taldeen artean oraingoz aukera gehien dituena, eta aretxabaletarrek, 8 punturekin, oraindik ez dute amorerik eman.
Hala, bi talde horien arteko derbia izango da domekan, (16:00), Agorrosinen. Norgehiagoka publiko barik izango da, baina Goiena telebistak partidua grabatuko du, astelehenean Harmailatik saioan laburpena eskaintzeko.
Romero, Mondra zuzentzen
Mondrak etxean jokatuko du zapatuan (16:30), Urolaren kontra, baina, aurreratu moduan, bi talde horiek ez dute aukerarik hurrengo faserako sailkatzeko, eta talde arrasatearrean hasi dira aldaketak egiten eta lasaitasunez datorren denboraldia planifikatzen. Lehenengo aldaketa entrenatzailearena izan da; izan ere, Aste Santuan adierazi zuen klub zuri-moreak azken bi urteetan entrenatzaile lanetan ibili den Asier Olaizolak ez duela aulkian jarraituko. Oraingoz, Ander Romero kirol zuzendariak hartuko taldea zuzentzeko ardura.