Iazko Tourrak izan zituen protagonista nagusiak dabiltza Itzulian ere aurreko postuetan lehian –Tadej Pogacar izan da gaur nagusi– eta bihar, hilak 8, lasterketa Debagoienetik pasako da. Gasteizen hasiko dute laugarren etapa, eta 13:20 inguruan sartuko da lasterketa bailarara –Arlabandik–. Hala, Deskarga da gurean igoko duten mendate bakarra. Dena dela, lasterketa hasieratik jende pilaketak ekiditeko deialdia egin dute.
Biharko lasterketan Debagoieneko kilometroak trantsiziokoak izango dira, ez dira erabakigarriak izango, ziklistek oraindik kilometro asko izango dituzte-eta Hondarribiara iritsi aurretik. Arlaban jaitsiko dute arratsaldeko lehenengo orduan, 13:20 inguruan, eta Eskoriatza, Aretxabaleta eta Arrasate saihesbidetik igaro ondoren Antzuolarako bidea hartuko dute Altos Hornosera iristeaz batera, eta Deskarga (14:05) igoko dute ondoren.
Zapatuan iritsiko da lasterketa ostera ere bailarara, eta hor 15:45 inguruan Elosu igoko eta ziklistak Gorlatik behera sartuko dira bailarara. Ondoren, Arraten amaituko dute erabakigarria izan daitekeen etapa.
