Irudi garrantzitsu ugari utzi zituen atzoko final historikoak. Lehen momentu deigarria partida hasi aurretik gertatu zen, jokalariak berdegunera ateratzen ari zirela ukitu baitzuen garaikurra Iker Muniainek. Irabazi aurretik hori egitea madarikaziotzat hartzen da, eta ondorengo 90 minutuetan ikusitakoa aintzat hartuz, Muniainek are handiagoa egin zuen superstizio hori. Bere alde esan beharra dago txuriurdinen ospakizunak ikusten gelditu zela azken momentura arte zelaian, kiroltasun handia erakutsiz.
Beste une gogoangarri bat Imanol Alguazilen partida osteko ateraldia izan zen. Realeko entrenatzaileak bere taldearen kamiseta eta bufanda jarri zituen medioen aurrean, eta zaletu sutsuaren azalean jarriz, animo oihuak dedikatu zizkion Gipuzkoa osoari. Bere jokalariek argi izan zuten zein zen Kopa irabaztearen erantzule nagusia, eta ez zuten zalantzarik izan oriotarra guztien artean altxa eta zabukatzeko orduan. Aurretik, Illarramendik Felipe VI Espainiako erregearengandik jaso zuen 2020ko trofeoa, Realaren historian ondo gordeta geldituko den argazkian ikusten den bezala.
