Finalerako aurreikuspena, bi kirol adituren eskutik

Imanol Beloki Unamuno 2021ko mar. 26a, 16:08
Rafa Mungia eta Haritz Gallastegi kirol esatariak Goienako erredakzioan.

Haritz Gallastegi eta Rafa Mungia kirol esatariek solasaldia egin dute apirilaren 3an Athleticek eta Realak jokatuko duten Errege Koparen finalaren bueltan. Bi adituen esanak Harmailatik saioan, astelehenean, 19:00etan, 21:00etan eta 23:00etan.

Ustezko iragarpenak egitea zilegi da, baina derbi baten emaitza jakitea ez da hain samurra, ezta kirol aditu batentzat ere. Ibilbide luzeko profesionalak izan eta Euskadi Irratiko esatari urte mordoa daramatzaten arren, Haritz Gallastegi elgetarrak eta Rafa Mungia arrasatearrak, finalaren atarian, norgehiagoka aurreko azterketa egin gura izan dute. Apirilaren 3an jokatuko den Errege Kopan esatari lanetan arituko dira bi debagoiendarrak, eta egunerako gogoz daude.

Ikusitakoa emozioz kontatu

Intentsitate handiarekin bizi dute futbola, eta, kasu honetan ere, hala arituko dira Errege Kopako finalean. Gallastegi athleticzale amorratua eta Mungia, berriz, realzale sutsua izan arren, neutraltasunez arituko dira, ikus-entzuleei kontakizuna ahalik eta errealen egiteko asmoz.

Astelehenean Goiena telebistan

Xabier Urzelai Goienako kazetariak gidatuta, Gallastegik eta Mungiak egindako solasaldia astelehenean egongo da ikusgai Goiena telebistako Harmailatik saio berezian.

Atzera kontaketa

Goiena telebistarako egindako solasaldian, Sevillatik programa berezia egingo dutela adierazi dute bi esatariek. Bi euskal taldeen lorpenak ere izango dituzte berbagai, eta horietan bizitakoak gogoraraziko dituzte. Bi taldeak ondo daudela adierazi dute biek ere. "Realak jokalari garrantzitsuak berreskuratu ditu, eta, urte askoren bueltan lehenengo finala izanda, derbi parekatua izango da", dio Mungiak. Gallastegik, berriz, Athletic partidu bakarrera hazi egiten den taldea dela dio: "Lehiatzen dakien taldea da, eta, hori dohain bat izanda, ez du opari handirik emango".

Horrekin batera, partiduaren aurretik titularrak zeintzuk izan daitezkeen ere bota dute. "Arrastoa utziko duen finala" izango dela dio Gallastegik; eta Mungiak, berriz, euskal futbolarentzat egun eta partidu "historikoa" izango dela.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak