983 milioi euroko aurrekontua izango du Aldundiak, eta zenbateko hori lortzeko, Ekonomia Itunaren Batzorde Mistoan adostutako defizit-ahalmena baliatu duela azaldu du.
Aurrekontuaren xehetasunei dagokienez, gizarte politiketako departamentuak 418,6 milioi euro izango ditu (inoizko zenbateko handiena). Markel Olano diputatu nagusiaren arabera, "adineko pertsonei arreta ematea" eta "bazterkeria arriskuan dauden pertsonen lan munduratzea" izango dira lan-ildoetako batzuk. "Foru Aldundiak tresna sendo bat izango du eskura, osasun, gizarte eta ekonomia krisialdiaren ondorioei eraginkortasunez aurre egin ahal izateko eta, gizarte kohesioa babestuz pandemiaren eragina gainditzeko", gehitu du.
Bestetik, Ekonomia Sustapeneko departamentuaren aurrekontua 115 milioikoa izango da, eta Etorkizuna Eraikiz-i lotutako proiektu estrategiko nagusiek 35,7 milioiko zuzkidura jasoko dute: MUBIL, Adinberri, Naturklima eta Elkar Ekin.