Hasieratik nagusitu da UDA eta Zaitegik lehen gola egin ostean, 22. minutua zela, hiru aldaketa egin ditu Mondrako entrenatzaile Asier Olaizolak aldi berean. Iraultza bilatzen zuen Olaizolak baina kontrako efektua lortu du eta bi taldeen arteko desoreka nabarmendu baino ez da egin. Zaitegik bigarrena penaltiz egin ostean, 2-0koarekin heldu da derbia atsedenaldira.
Astelehenean, 21:30etik aurrera, Harmailatik saioan ikusi ahalko da laburpena, UDAko Julen Zaitegiren eta Mondrako Aritz Ezpeletaren balorazioekin.
Bigarren zatian ildo beretik jarraitu du norgehiagokak, Mondrak ez du-eta erreakziorako inongo gaitasunik erakutsi eta are nabarmenagoa izan da UDAren nagusitasuna. Hirugarren eta laugarren golak ere Zaitegirenak izan dira eta laugarrena egin eta segundo gutxira, atzealdean egindako akats nabarmen bategatik, bosgarrena egin dute etxekoek penaltiz. Mondra noraezean zebilen, etsita, eta esan daiteke hurrengo ia ordu erdia soberan geratu zaiola derbiari. Amaieran, UDA 5, Mondra 0.
Amaieran, bereziki pozik zegoen UDAko aurrelari Julen Zaitegi: "Ez dakit sekula lau gol egin ditudan... Entrenamenduetan ere ez ditut horrenbeste egiten. Oso pozik nago, futbolaz gozatzen ari naiz".
Txanponaren beste aldean, aldiz, Mondrako atezain Aritz Ezpeleta: "Hausnartu egin beharko dugu, gaur oso maila eskasa eman dugu-eta. UDA askoz gehiago izan da; halakoetan, autokritika egin eta arerioa zoriondu besterik ez dago".
