Mahoneroek eta sarrailagileek egutegian gorriz markatutako egun horietako bat biziko dute bihar arratsaldean, 16:30ean, Mojategiko futbol zelaian. Oraingo honetan, baina, zaleen berotasuna faltan sumatuko dute jokalariek. Ligako bina partidu jokatuta, lau puntu batu dituzte bergararrek; bakarra, ostera, arrasatearrek. Biek ala biek aukera polita izango dute, beraz, play-off postuen borrokan aurrerapauso bat emateko.
Mondrak, gainera, beste derbi bat jokatuko du datorren asteburuan, aretxabaletarren aurka neurtuko baititu indarrak, Ibarrako zelaian.
Boleibolari dagokionez, denboraldiko hamalaugarren norgehiagoka jokatuko du Arizmendi taldeak zapatu arratsaldean, 17:30ean hasita, Ibarrako kirol-degian. Aurrean postu bat gorago dagoen Beco Laredo taldea izango dute jokalariek.
Etxean jokatuko dute, baita ere, Arrasate-Ordizia taldeko errugbilariek, baina ez Mojategin, Ordiziako Altamira zelaian baizik. Ligako lehen garaipena eskuratzera aterako dira bihar, 18:30ean, Atletiko San Sebastian-Hernani taldearen aurka.
MU, lidergoa sendotzera
Joan den astean Solaresi etxean 85-79 irabaztetik abiatuko dira Iruñera Mondragon Unibertsitateko saskibaloi jokalariak, domekan jokatuko baitute, arratsaldeko seietan, Megacalzados Ardoiren aurka. Lehen postua are eta tarte handiagoaz egonkortzeko aukera izango du Ointxe!-ko taldeak, momentu honetan hiru puntu ateratzen baitizkie nafarrei.