Guztira hamasei pilotarik, zortzi bikotek, izango dute txapelketa horretan parte hartzeko aukera, eta final-laurdenekin ekingo diote lehiaketari. Mugikortasun murrizpenak direla eta, ezin izan da urtero ospatzen den esku pilota lehiaketa berbera antolatu, hala ere, Emakume Master Cupetik adierazi dute erantzuna "sekulakoa" dela, 80 emakumek eman dutelako izena lehiaketan jokatzeko.
Zapatuko jardunaldia bitan banatuko da; goizez, bi partida jokatuko dira: A taldean, Irantzu Etxebeste eta Olatz Ruiz de Larramendi bikotea Amaia Aldai eta Gentzane Aldai bikotearen aurka; eta B taldean, Leire Garai eta Oihana Orbegozo, Miren Larrarte eta Ane Urkizu bikotearen aurka.
Arrate Bergarak final-laurdenak jokatuko ditu Ainhoa Ruiz de Infanterekin batera Asteasun, 16:30ean, eta dena ondo baldin badoa, finalerdiak jokatuko ditu Irunen, martxoaren 20an. Lehiaketaren finala, iaz bezala, Bidasoako herrian jokatuko da, apirilaren 4an eta partida guztiak EITBn ikusi ahalko dira.