Garaipen beharra zeukan Aretxabaletak. Urrian, ligako jardunaldi bakarra jokatu zutenean Larbururen mutilek 3-3 berdindu zuten Mutrikuren kontra, eta joan den astean Unben galdu eta gero atzeko postuetan murgildu ziren aretxabaletarrak. Ez zen liga hasteko modu ona, kontutan izanda playoff-etan izango diren lau talde onenen artean egoteko ezin dela askorik barkatu. Baina gaur, Ibarran, oso partidu serioa egin dute aretxabaletarrek, ondo jokatuta, gainera. Lehenengo 20 minutuak nahikoa izan dira partidua, neurri handian, bideratuta uzteko, eta hor Unai Beloki eskoriatzarra izan da protagonista, bereak izan dira-eta bi golak.
Bigarren zatia hastearekin batera Urolak estutu du apur bat, eta UDAko entrenatzaileek ez erlaxatzeko eskatzen zieten jokalariei. Eta orduan etorri da Urolaren esperantza guztiak zapuztu dituen Zaitegiren gola (3-0), eta ez da arratsaldeko bakarra izan. Izan ere, 4-0ekoan burukada ederrarekin utzi du Arrasateko aurrelariak partidua erabat erabakita. Hala, Urolak 4-1ekoa egin du jokaldi nahasi batean, ordurako aretxabaletarrak ere erlaxatzen hasita zeudenean.
Bada, datorren asteko atsedenaldira lasai joateko moduko garaipena batu dute UDAkoek, izan ere, bi aste barru derbi erakargarria jokatuko dute Mondraren kontra.
Aretxabaletaren hamaikakoa: Iker, Iban, Ibai, Illarra, Aitor, Danel, Josu, Zaitegi, Urzelai, Beloki. Ordezko moduan egon dira: Letona, Baztan, Adrian, Txino, Jon, Mikel, haritz.
Urolaren hamaikakoa: Alonso, Badiola, Elizburu, Erostarbe, Igor, Asier, Mujika, Pastriain, Viedma, Zabala. Ordezko moduan egon dira: Mediavilla, Nuñez, Tapiador, Nabil, Isasa eta Lazaro.
