Lasterketa gosez dago jendea, pentsa, gaur Zumaiako Sari Nagusian 166 txirrindulari iritsi dira helmugara, kopuru polita da hori. Eta guztien artean azkarrena Caja Rural taldeko Marc Brustenga izan da (2.31.28). Bada, 112 kilometro izan dituen lasterketan aurreko taldea ez da apurtu, eta 45 laguneko multzoa sartu da denbora berean. Hala, talde horretan zegoen Debagoienak kategorian izango duen ordezkarietako bat, Andoni Azkarate arrasatearra (Grupo Eulen). Unai Cueva oñatiarra (Grupo Eulen) 17 segundora helmugaratu da (66. helmugan) eta hiru segundura helmugaratu da Asier Azkarate (Grupo Eulen).
Zailtasunekin, baina aurrera
Lasterketetako antolatzaileak zailtasunekin dabiltza hitzorduak antolatzen. Esaterako, hurrengo astean Urretxun jokatu behar zuten Urretxuko sari nagusia, baina martxoaren 6ko hitzordua bertan behera utzi dute. Eta, beste horrenbeste gertatu da martxoaren 27an Laukizen egin behar zuten lasterketarekin. Bada, dena ondo bidean martxoaren 21ean Lizarran egingo dute hurrengo proba, eta martxoaren 28an izango da Lokatzak antolatzen duen Gorlako Igoera.
