Martxoaren 8ra begirako kanpaina aurkeztu dute gaur Beatriz Artolazabal Berdintasun, Justizia eta Gizarte politiketako sailburuak eta Izaskun Landaida Emakundeko zuzendariak. Kanpainaren bitartez zaintza partekatzearen beharra ikusaraztea nahi dutela azaldu dute.
Sailburuak azpimarratu du emakumeen eta gizonen arteko zaintza lanen banaketa "desorekatua" dela, eta horrek eragina duela egunerokoan: "Emakumeen desabantaila sozioekonomikoa indartzen du, hezkuntzarako, osasunaren arretarako, bizitza publikorako eta ordaindutako enplegurako duten sarbidea mugatuz”.
Bestetik, Landaidak gehitu du garapen ekonomiko, kultural eta ongizate sozial "handiko" gizarte batek "ezin duela onartu" biztanleriaren zati batek, emakumeek, bere gain hartzea zaintza-lan gehiena: "Zaintza erdigunean jartzeko beharra feminismoaren aldarrikapen handietako bat dela, eta, era berean, zaintza horiek balioesteko eta modu orekatuan banatzeko beharra hainbat esparru programatikotan jasotako helburua da".
