Leintz Eskola Kirolak gogorarazi du infantil mailako kirolariek Eskola Kirola atzean utzi, eta gustuko duten kirolean aritzeko aukera dutela. Hori kontuan izanda, LEKek aukera zabala ematen die gazteei, bailarako elkarteekin dituen hitzarmenak direla-eta.
Jakinarazi dute, momentu honetan, eskubaloia (Arrasaten), gazte-fitness (Aretxabaletan), igeriketa (Arrasate, Aretxabaleta eta Eskoriatzan) eta eskupilota (Eskoriatzan) taldeetan daudela gaztetxoak: "Kirol eta erronka berriak probatu nahi izanez gero, ez izan zalantzarik eta ikastetxeko koordinatzailearekin harremanetan jarri".
Entrenamenduak, intzidentzia-tasaren araberakoak
Aurretik aipatutako taldeen entrenamenduak baimenduta daude, gaur-gaurkoz, izan ere, Aretxabaleta, Arrasate eta Eskoriatza ez daude "gune gorrian". Baina Aramaion aldiz, saioek etenda jarraitzen dute.
