Kirol Enpresako Berrikuntza eta Kudeaketarako Masterra eta Kirol Berrikuntzan Graduondoa izango dira Mondragon Unibertsitateak beste bi enpresekin eskainiko dituen ikasketak. Kirolaren "balioak sustatzea", sektorearen "profesionalizazioan eta prestakuntzan sakontzea" eta kirol-indarkeriaren aurka "kontzientzia piztea" dira, besteak beste, lankidetzaren helburuak.
Azaldu dutenez, Kirol Berrikuntzako Graduondoa 27 eta 50 urte bitarteko profesionalei dago bideratuta: "Kirol-sektorean kokatuta dauden enpresetan berrikuntzak egin nahi dituztenei edo kirol-arloko enpresa-proiektu bat abian jarri eta garatzeko prest daudenei dago zuzenduta, batez ere". Horretarako, dagoeneko bi edizio egin dituen Executive programa erabiliko dute.
Bestalde, Kirol Enpresako Berrikuntza eta Kudeaketarako Masterra kirola gogoko duten 22 eta 27 urte bitarteko gazteei dago bideratuta; "kirol-sektorean lan egiteko gaitu eta kirol-arloko beren enpresa-proiektua modu praktikoan osatu nahi dutenei", alegia. Lehenengo edizioa egiten ari dira, eta bigarrenean izena emateko aukera irekita dago.
Irakasle ezagunak
Aurreratu dutenez, programetako irakasleen artean, aurpegi ezagunak ikusiko dituzte ikasleek. Adibidez, Vicente del Bosque, Julen Guerrero, Xabi Prieto, Patricia Ramirez edota Jero Garcia.