Hiru setak galdu zituzten atzo etxekoek (7-25; 16-25 eta 19-25). Hala ere, emaitzek erakusten duten moduan, behetik gorako bidea egin zuen etxeko taldeak. "Kontuan hartu behar da gu baino talde hobea dela. Bukaeran asko hobeto dugu eta horrekin geratu behar gara", dio Berjanok.
Taldea aurten sortua denez, aitortu du asko dutela hobetzeko oraindik, baina ari direla horretan lanean. "Hasieran, harrerak egiterakoan, baloi asko kanpora joaten zitzaizkigun eta batez ere horretan ari gara hobetzen saiatzen". Eta entrenamenduetako lan hori fruituak ematen ari da, izan ere, bi garaipen eskuratu dituzte orain arte. "Denboraldi hasieran, pentsatzen genuen ez genuela partidurik irabaziko. Lehenengo garaipenak asko motibatu gintuen, eta gero beste bat ere lortu genuen irabaztea. Oraindik baditugu partidu batzuk aurretik eta ea nola joaten den guztia. Espero dugu beste pare bat partidu, behintzat, irabaztea. Daukagun guztia emango dugu, hori seguru".
Momentu hauetan, bederatzi taldeko ligan zazpigarren postuan dago Arizmendi, 10 punturekin, eta datorren partiduan izan dezakete hirugarren garaipena lortzeko aukera, haiek baino puntu bat gehiago daukan Jatorkide Juvenil taldearen aurka.