Arrasateko herriko plazan egin dute herritarrek elkarretaratzea urtarrilaren 4an Aizarnazabalen (Gipuzkoa) eraila agertu zen Aintzane Pujana donostiarra gogoan dutela. "2021. urtea gogor hasi da indarkeria matxistari dagokionez, Euskal Herriko urteko lehen erailketa matxista gertatu da. Matxismoaren pandemia salatzera etorri gara. Hau ez da gelditu", adierazi du Arrasateko mugimendu feministaren izenean, bilgune feministako kide den Garazi Bedatsek.
Bedatsek gaineratu du "pandemia matxista" honi aurre egiteko bidea feminismoa dela: "Herriak, kaleak, jendartea... feminismoz kutsatzea da gure antidotoa. Horretarako, emakumeen zaintza sare feministak izango dira gure irtenbidea, nahiz eta pandemia egoera honetan oztopoak egon hori egiteko".
Oñatin ere bai
Oñatin ere feminismoa aldarrikatu zuten eraso matxisten aurrean, atzo iluntzean egindako elkarretaratzean. Aintzane Pujana izan zuten gogoan plazan egindako kale agerraldian. Aretxabaletan eta Bergaran iluntzean egingo dituzte donostiarraren erailketa salatzeko kale bilkurak.
Aretxabaletan ere elkarretaratzea
Aretxabaletan ere hainbat herritar elkartu dira zapatu arratsaldean, Herriko Plazan, Udalak eta Mugimendu Feministak elkarrekin egindako deialdian. Ordu erdiz egon dira isilean, Aski da! lelodun pankartaren atzean.