Ez dira kanpoko jokalari mordoa izateko sasoi onenak, baina horren aurrean, etxeko gazteek pauso bat aurrera eman dute, eta Iñaki Ogara Arri-k denboraldian zehar banatzen dituen minutu horiei zukua ateratzen dabiltza etxeko gazteak: "Eta halako kategoria batean ez da erraza kantxara irten eta ez kikiltzea. Kontrara, gaur talde osoak eman du maila ona, baina bereziki harrobiko jokalari gazteen lana nabarmendu nahiko nuke".
Aparteko zailtasun barik
Goierriren kontrako aurreko derbietako batzuk gaurkoak baino estuagoak izan dira. Zuri-moreak ondo kantxaratu dira eta lehenengo bi laurdenetan dezente hobeak izan dira (42-29). "Atsedenaldian berba egin dugu baina bigarren zatia hasi eta berehala esandako guztiak ez du ezertarako balio izan. Goierrik hiruko hiru saskiratze egin ditu eta ostera ere sartu dira partiduan. Eta, hor lortu dute etxeko gazteek partidua apurtzea, gaurko garaipenean zeresan handia izan dute eurek".
Hala, nabarmentzekoa izan da azken laurdenean etxeko jokalariz osatutako boskotearekin jokatu duela MUk: "Etorkizun batean eurek izan beharko dute protagonista, eta normala da poliki-poliki halako egoerak ikustea. Aste barruan lan ona egiten dabiltza eta partiduetan ikusten da emaitza. Baina, prozesu luzea da hau, pazientzia izan behar dugu gazteekin".
Datorren astean Logroñora
Bi jardunaldi jarraian jokatu ostean MUk Errioxan jokatuko du datorren astean: "Oso maila oneko taldea da, hasierako boskotea zilarrezko LEB mailan lehiatzeko modukoa dute. Aurrean ibiliko dira denboraldi amaieran", adierazi du Arri-k.
Gogoan izan pandemia egoeran Arrasate berriro ere zona gorrian sartuko balitz ere ez lukeela eraginik izango EBA kategorian.