Huhezinema jaialdian filmak aurkezteko epea ireki dute, komediazko sari berriarekin

Hasier Larrea 2021ko urt. 15a, 17:08

Gaurtik  otsailaren 16ra arte egongo da jaialdiaren 14. ediziora film laburrak bidaltzeko aukera. Horrez gain,  kartel lehiaketan aurkezteko epea otsailaren 1ean amaituko da. Ekitaldia martxoaren 16tik 18ra ospatuko da, baina oraindik formatua zehazteke dago, COVID-19 dela eta.

2020ko martxoan jaialdiaren 13. edizioa online egin ondoren, "indarberrituta"  eta sari berriarekin dator Huhezinema Euskal Film Laburren Jaialdiaren 14. edizioa, Komedia Sariarekin, alegia.

Antolatzaileek aipatu dutenez, edozein gai edo estiloko film laburrak aurkeztu ahalko dira. Sail Ofizialerako 10 finalista aukeratuko dira eta bakoitzak 200 euroko diru sarrera jasoko du proiekzio eskubideen truke. Sail Ofizialean eta Mondragon Unibertsitatea Sailean, berriz, 4.000 euro baino gehiago banatuko dituzte, "kultura eta sormenaren egoera latzari bultzada bat" emateko asmoz.

Jaialdia martxoaren 16tik 18ra ospatuko dira, baina oraindik formatua zehazteke dago, COVID-19 dela eta.

Esteka honetan aurkitu ahal dira lehiaketara aurkeztu nahi diren film laburrek bete behar dituzten baldintza guztiak. Zinema "maite, sortu eta bizi" duten guztiei aurtengo edizioan parte hartzera gonbidatu diete antolatzaileek.

2008tik abian

Mondragon Unibertsitateko Humanitate eta Hezkuntza Zientzien Fakultateak, HUHEZIk, sortu zuen Huhezinema Euskal Film Laburren Jaialdia, 2008. urtean. Ordutik, 'Kultur ekitaldien antolaketa' izeneko lan proposamenaren barruan, ikus-entzunezko graduko 4. mailako ikasleek antolatzen dute "erreferentziazkoa" bilakatu den jaialdia.

Informazio gehiagorako, 656 73 25 86 (Iban del Campo – Huhezinemako koordinatzailea) eta 697 535 795 (Igor Eguen – Prentsa arduraduna) telefonoetara deitu dezakete interesatuek.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak