Tokikom sarien helburua sarritan ezezaguna den toki komunikabideen lan profesionala aldarrikatu eta gizarteratzea da, eta horretarako hiru sari ezberdin banatzen dira urtero: azalik onena, edukirik onena, eta ikus-entzunezkorik onena. Aurten, gainera, publikoak bozketa bidez erabakitako Komunitatearen saria ere izango da.
Ekitaldia zuzenean, Tokikom sareko hedabideen webgunetan
Berez, aurtengo sari banaketa ekitaldia Hernanin egitea tokatzen zen, Kronikak irabazi baitzuen 2019ko edukirik onenaren saria. Baina segurtasun neurriak tarteko, azkenean bertan behera utzi behar izan dute ekitaldi presentziala, eta haren ordez, sari-banaketa telebista saio baten bidez egingo dute. Idoia Torregarai eta Mirari Martiarena umoregile ezagunek gidatuko dute saioa, umore klabean beti ere, ekitaldi entretenigarri eta originala egiten saiatu dira. Tokikom sareko hedabideen webguneetan ikusi ahal izango da streaming bidez, aldi berean, gaur, abenduak 17, 19:00etan hasita.