Azkenaldiko bolada txarrari amaiera emateko asmoz irtengo dira kantxara Arizmendiko boleibol taldeko gizonezko jokalariak. Lau neurketa jokatuta, garaipen bakarra eskuratu dute Euskal Ligan debutatzen ari diren mutilek.
Zapatuan, 17:00etan, Bera Bera Bultz taldea jasoko dute; donostiarrak Euskal Ligako lehenengo mailako hirugarren sailkatuak dira, lau partida irabazita.
Aurreko asteburuan ez zuten partidarik jokatu Leintz bailarako ordezkariek, atseden-astea tokatzen zitzaielako; pilak kargatzeko aukera eduki dute, beraz. Lan-saioetan prestatutakoa baliatzera aterako dira jokalariak Ibarrako kiroldegiko boleibol pistara, baita eskarmentu handiagoa duten aurkariei ezustekoren bat edo beste ematera ere. Urteko azken aurreko neurketa izango da Arizmendirentzat.