Rikardo Arregi Kazetaritza Sariaren 32. edizioaren ekitaldia egin da Andoaingo Bastero kulturgunean. Bi sari banatu dituzte: kazetaritza saria eta komunikazio saria. Lehenengoa, Euskadi Irratiko Osasun Etxea saioak lortu du. Komunikazioari dagokiona, berriz, CodeSyntaxen Egunean Behin jokoak irabazi du. Saridun bakoitzak 9.000 euro eta Xabier Lakaren eskultura bat jaso ditu.
Osasun Etxearekin eta Egunean Behinekin batera beste sei finalista zeuden: kazetaritza saria lortzeko hautagaiak ziren Miel Anjel Elustondo, Berria egunkarian argitaratutako Tonban ehortzirik testu sortagatik, Euskadi Irratiko Albiste Faktoriako lantaldea eta Koronabirusaren azken datuak atala egin duen Berriako lantaldea. Komunikazio sariari dagokionean, finalista izan dira Ene Kantak proiektu komunikatiboa, Arteman, Lur eta Amets filmaren komunikazio prozesuarengatik, eta Mendiak eta Herriak elkartea eta Et Incarnatus Orkestra eta Sorland Komunikazioa, Urmuga proiektuaren spotarengatik.
Xabier Lete gogoan lelopean egin da ekitaldia, eta haren kantuak entzun dira Joxan Goikoetxea, Klara Mendizabal, Petti eta Antton Valverde musikarien eskutik.