Lehiaketa ofizialak martxa hartzen dabiltza, poliki-poliki bada ere. Asteburu honetan, adibidez, EBA mailako neurketa jokatuko du Mondragon Unibertsitateak, Iturripen. Arrasateko saskibaloi taldeak Megacalzados Ardoiren aurka neurtuko ditu indarrak, igandean, 18:30ean hasita. Izan ere, Ointxe!-ren talde nagusiak ligako bi partida baino ez ditu jokatu, momentuz, baita biak irabazi ere.
Arizmendiko gizonezkoen boleibol taldeak ere etxean jokatuko du domeka goizean. Gasteizko Udapa Jatorkide Senior taldea jasoko du, Aretxabaletako Ibarra kiroldegian, 11:00etan hasita. Euskal Ligako lehen mailan lehiatzen diren jokalariak joan den asteburuan itzuli ziren kantxara, lau asteko geldiunearen ostean. Orduko hartan, galdu egin zuten Sestaoren aurka. Bitik bat irabazi dute mutilek.
Jaurlaritzak aste honetan berretsi duenez, kirol-ekitaldiak publikorik gabe garatuko dira momentuz, abenduaren 10era arte behintzat.