Indarkeria matxistaren aurkako egunaren bueltan hainbat ekintza antolatu ditu Deba bailarako Itaia taldeak, "indarkeria matxistaren kontra antolatzearen beharrezkotasuna" azpimarratuz. Ohar bidez jakinarazi dutenez, pandemiaren tetsuinguruan, "geroz eta garrantzitsuagoa da guztiontzat bizi baldintza beraren exijentzia": "Guztiok bizi baldintza berak edukitzearen aldarriaren baitan kokatzen dugu emakume langileok lan-harreman prekarioak ez izatea, kaletik ibiltzearen beldur ez izatea, etxera sartzerakoan senarrak joko gaituenaren beldur ez bizitzea, etxeko lan guztiak gure bizkar hartu behar ez izatea, etab."
"Politikak gauzatzea"
Eskualdeko hitzaldi eta mobilizazioetan parte hartzeko dei egin diete herritarrei. "Eraso matxista oro gaitzetsi eta horren aurka antolatzea guztion eginbeharra" dela azaldu dute, "indarkeria matxista testuinguru oro desagertarazteko eta eraso guztiei aurre egiteko politikak gauzatuz". Testuinguru horren baitan antolatu dituzte asteburuan egingo duten hitzaldia, baita azaroaren 25ean Euskal herriko hainbat eskualde eta hiritan deitu dituzten mobilizazioak.
