Eusko Jaurlaritzak 38/2020 Dekretuaren interpretazio-irizpideei buruzko 'Ohiko galderen erantzunak' dokumentua eguneratu berri du, ostalaritza-zerbitzuei dagokienez.
Ostalaritzako eta jatetxeetako jantokiek itxita jarraituko dute, hoteletako eta ostatuetako jantokiek izan ezik. Etxez etxeko otorduak prestatu eta zerbitzatu ahal izango dira, edo bertan jasotzeko aldez aurretik hitzordua eskatuta, 21:00ak arte.
Itxieratik salbuetsita geratzen dira gasolindegietako eta zerbitzuguneetako jatetxe-zerbitzuak errepidez zirkulatzen ari diren pertsonentzat, osasun-zentreetakoak, zerbitzu sozio-sanitarioetakoak, eskola, lan eta unibertsitateetako jantokiak eta izaera sozialeko jantoki- zerbitzuak. Hortaz, kafetegi-zerbitzua eskaintzen duten okindegi eta gozotegiak eramateko produktuak saltzeko bakarrik zabaldu ahalko dira. Establezimendu horien barruan ezin da ez edaririk ez janaririk kontsumitu.
Jatetxeek eta tabernek edozein edari edo alkohol mota saldu ahal izango dute eramateko, janari-eskaera baten parte bada eta aldez aurretik hitzordua eskatuta. Ezin izango dute soilik edari alkoholdunik saldu eramateko. Eramateko kafeak edo alkoholik gabeko edariak saldu ahal izango dituzte, nahiz eta janari-eskaera baten parte ez izan. Gogorarazten da Dekretuak berariaz debekatzen duela alkohola bide publikoan kontsumitzea.
Neurrien arrazoiak
Neurriak "osasun publikoa zaintzeko, erabateko konfinamendua saihesteko eta birusa transmititzeko foku nagusiak mozteko" hartu direla argudiatu du Jaurlaritzak, eta gogorarazi du transmisio-maila 5. mailakoa dela, hau da, Transmisio Oso Altua.
Birusa kutxatzearen eragilea ez dela "ostalaritza bera", baizik eta "pertsona askok ostalaritza-establezimenduetan gauzatzen duten interakzio sozial jarraitu, erlaxatu, distantzia eta maskararik gabeko portaera" dela adierazi du, "aste askoren ondoren iraun duena eta zuzendu ez dena".