Ostalaritza laguntzeko 30 milioi euroko zuzkidura izango du planak, eta beste 15 milioi gehituko zaizkio erresistentzia-planetik eratorrita. Hurtado sailburuak azaldu duenez, 12.000 enpresa baino gehiagori laguntzea da asmoa: "Euskal ostalaritzarako laguntza-programa beste urrats bat da, eta 12.000 enpresa txiki baino gehiagori laguntzea du helburu. Izan ere, negozio txiki gehienek hiru langile baino gutxiago dituzte, eta asko familia-negozioak dira".
Hala, laguntzak autonomoei, mikroenpresei eta enpresa txikiei zuzenduta egongo dira soilik, eta sailburuaren esanetan, enpleguari "eusten laguntzea" izango da helburu nagusia. Baldintza horiek betetzen dituzten 12.219 negozio daude EAEn sailburuaren arabera, baina laguntzak jasotzeko gutxienez lau hilabetean "jardunari eusteko" eskatuko die Jaurlaritzak ostalariei.