2021. urteko Korrikaren xehetasunak aurkezteko prentsaurrekoa behar zuenean jakinarazi dute erabakia, Donostiako San Telmo museoan. "Pandemiaren transmisioa ahalik eta gehien kontrolatzeko" asmoz hartutako erabakia dela azaldu dute Alizia Iribarren AEK-ko koordinatzaile nagusiak eta Asier Amondo Korrikako arduradunak. Erabaki "latza" izan dela aitortu dute: "Euskararen aldeko ekitaldirik jendetsuena eta zirraragarriena ez dugu orain izango, eta badakigu euskararen aldeko bultzada ezin dela apaldu".
"Baldintza aproposetan" egin guran
Asier Amondok aitortu duenez, erabakia duela 15 egun hartu zuen antolakuntzak, izan ere egoera ikusita Korrika ohiko moduan antolatzea "ezinezkoa" da: "Desiratzen dugun baldintzetan egin nahi dugu, une honetan ez baitugu Korrikaren ordezko eskas bat nahi". Dena ondo bidean 2022ko udaberrian egingo dutela azaldu du Amondok: "Denbora gehiago hartu nahi dugu, normalitate berria nondik nora joango den ikusteko, etorkizuna hobeki ezagutzeko, eta denok desiratzen dugun Korrikara iritsiko gara, 2022. urteko udaberrian"
Euskaraldira batzeko deia
AEK-etik unea baliatu nahi izan dute herritarrak martxan den Euskaraldiaren bigarren aldian parte hartzera animatzeko: "Belarriprest edo Ahobizi izan gaitezen animatu nahi dugu Korrikazale oro".