Foru Aldundi eta Eusko Jaurlaritzako jarraibideen arabera, eskola kiroleko aste barruko ekintzak martxan jartzeko aukera dugu dagoeneko. Behin izen emate epeak amaituta (norbaitek ez badu egin, jar dadila harremanetan koordinatzailearekin), jaso ditugun izen emateekin ekintzak martxan jartzeko prestaketa lanetan gabiltza, eta ikastetxe bakoitzak jakinaraziko dizue noiz hasiko diren saioak, eta instalakuntzaren arabera jarraituko den protokoloa (hauek webgunean ere ikusgai izango dituzue laster).
"Kirol elkartetako ekintzen kasuan, aste honetan pasako dizkiegu gure bitartez jasotako izen emateak eta beraiek jarriko dira zuekin harremanetan, saioen hasiera, antolaketa eta jarraituko diren protokoloen berri emanez", adierazi dute LEKeko ordezkariek.
Protokola prest
Honetaz gain, dagoeneko Leintz Eskola Kiroleko webgunean COVID-19 atala sortu dute eta bertan daude ikusgai, ekintzetan LEKetik jarraituko dituzten protokolo guztiak.
Infantilak martxan
Azkenik, infantil kategoriako taldeak martxan ari dira dagoeneko (Eskubaloian mutil eta nesken taldeak eta saskibaloian, nesken taldea) eta jakinarazi dutenez, eskubaloi taldeetan neska eta mutilen beharrean daude.