Eusko Jaurlaritzako Hezkuntzako sailburuorde izendatu dute Begoña Pedrosa. Mondragon Unibertsitateak azaldu duenez, dekano moduan egondako urteetan, besteak beste, hezkuntza berrikuntza, eraldaketa eta digitalizazioa izan ditu ardatz: "Pedrosak unibertsitateko gradu eta masterretako produktu akademiko berriak sortzea bultzatu du eta baita unibertsitatearen eta eskolaren arteko ikerketa kolaboratiboa sustatu ere".
Bestetik, gehitu dute Fakultateko Hizkuntzaren eta Literaturaren Didaktika saileko irakasle eta ikertzailea izan dela, eta irakasle moduan, hainbat berrikuntza-proiektu koordinatu dituela Hezkuntza eta Ikus-entzunezko Komunikazioko graduetan. "Halaber, doktorego-programaren eta ikerketa-mahaiaren kudeaketan ere parte hartu du", azaldu du Unibertsitateak. Ikertzaile gisa hizkuntza gutxituetako testuinguruetan eleaniztasunerako gaitasunen garapena landu ditu, besteak beste.
