Astuntasuna, hantura, nekea eta kalanbreak dira barize edo armiarma baskularren agerpena aurreikus dezaketen lehen sintomak, Gasteizko Quironsalud ospitaleko Roberto Dominguez medikuak azaldu duenez. Espezialistak gomendatu du lehen sintomak detektatzen dituenetik kontsultara joatea, gaixotasuna errazago tratatzen baita fase goiztiarretan egiten; eta zehaztu du:"Denbora pasatzen uzten badugu, barizeek eboluzionatu egingo dute, eta tratamenduak konplexuagoak izan daitezke".
Barizeak tratatzeko, batere inbaditzaileak ez diren gero eta teknika gehiago daude. Fernandez doktoreak azaldu duenez, “gaur egun patologia baskularren %75 trata daitezke batere inbaditzaileak ez diren tekniken bidez, onargarriagoak dira, ez dute ospitaleratzerik behar izaten eta errekuperazioa azkarragoa da”. Kasu batzuetan,
emaitzarik onena ziurtatzeko, ohiko kirurgiara jotzea komeni da. Horregatik, bereziki garrantzitsua da espezialistarengana jotzea, egoera bakoitza baloratu eta tratamendu pertsonalizatu egokiena zehaztu dezan.
Teknika berriak
Dominguez doktoreak azaldu duenez, irrati-frekuentzia zainari beroa igortzen dion teknika bat da, ixtea eragiteko. "Anestesia lokalarekin eta sedazio leunarekin egiten da, eta oso ondo toleratzen da kasu gehienetan", adierazi du espezialistak. Teknika honetarako saio bakarra behar izaten da.
Mikroapar-tratamendua edo eskleroterapia: prozedura terapeutiko bat da, kontsultan egiten da, eta mikroaparra injektatzen da kaltetutako zainetan. Horrek kalte kimiko kontrolatua eragiten dio zainaren hormari, eta, horrela, itxi eta desagerrarazi egiten da. Ia barize guztietan eta armiarmetan erabil daiteke, emaitza estetiko egokia emango duen irtenbide bat bilatzeko. Saio kopurua barizeen larritasunaren eta hedaduraren arabera alda daiteke.