COVID-19k eragindako osasun-krisiari aurre egiteko prebentzio-neurriak ez betetzeagatik Ertzaintzak eta EAEko herrietako udaltzaingoek 10.361 salaketa jarri dituzte ekainaren 18tik irailaren 15era arte. Horietatik 5.174 salaketa jarri ditu Ertzaintzak , eta udaltzaingoek, berriz, 5.187, gehienak maskara ez erabiltzeagatik.
Lurraldeka aztertuz gero Bizkaian jarri dituzte salaketa gehien, 5.684 zehazki. Gipuzkoan eta Araban ordea salaketa kopurua nahiko berdintsua da; 2.582 eta 2.089 salaketa, hurrenez hurren.
Maskara eta botila festa
Salaketen arrazoiari erreparatuta, 8.500 salaketa inguru maskara ez eramateagatik edota maskararen erabilera desegokiagatik jarri dituzte. Bide publikoan edariak kontsumitzeagatik edo botila festa egiteagatik 1.020 salaketa jarri dituzte, 680 Ertzaintzak eta 340 udaltzaingoek.